Çу уйăхěн 27-мěшěнче Санарпуç шкулěнче Сывлăх кунне паллă турěç. 1-8 класра вěренекенсемшěн чăн-чăн уяв пулчě. Ачасем станцисем тăрăх çÿресе тěрлě конкурса хутшăнчěç: «Скакалкăпа сик», «Вырăнтан сик», «Мечěке тěл пер», «Канат турт», «Турник çинче туртăн», «Дартс» тата ытти те. Çавăн пекех классем пěр-пěрин хушшинче футболла вылярěç тата канат туртса вăй виçрěç.
Кěске вăхăтрах ачасем сикме, мечěк тапма, туртăнма, тěл пеме, велосипедпа ярăнса ăмăртма пултарчěç. Ăмăртусенче туслăх çěнтерчě. «Чи хастаррисем», «Чи туслисем», «Чи пултаруллисем», «Чи вăйлисем», «Спортпа туслисем», «Чи хăюллисем» номинацисенче панă Тав хучěсем вěренекенсене хавхалантарчěç.
«Уяв пурин кăмăлне те кайрě. Вăл чăваш акатуйне аса илтерчě. Акатуй шÿрпесěр пулать-и вара? Какай шÿрпине пурте юратса тутанчěç. Техěмлě апат вăй хушрě.
Асатте-асаннесенчен куçнă йăла-йěркене манар мар – сывлăхлă пулар! Спорта аталантарар!
